പി ആർ അരുൺ സംവിധാനം ചെയ്ത് റെജിഷ വിജയൻ പ്രധാന താരമായി എത്തുന്ന പ്രധാന ഓണം റിലീസുകളിൽ ഒന്നായി ഇന്ന് തിയേറ്ററിൽ എത്തിയ ചിത്രമാണ് ഫൈനൽസ്. മണിയൻ പിള്ള രാജു, പ്രജീവ് എന്നിവർ ചേർന്നാണ് ഈ ചിത്രം നിർമ്മിച്ചിരിക്കുന്നത്. നിരഞ്ജ് മണിയൻപിള്ള രാജു, സുരാജ് വെഞ്ഞാറമൂട്, ടിനി ടോം തുടങ്ങിയവർ അഭിനയിക്കുന്ന ചിത്രം പറയുന്നത് ഇന്ത്യയെ പ്രതിനിധീകരിച്ചു ഒളിമ്പിക്സിൽ പങ്കെടുക്കുന്ന അന്താരാഷ്ട്ര സൈക്ലിങ് താരമായ ആലീസ് എന്ന യുവതിയെ പറ്റിയാണ്. പൂർണമായും ചിത്രം പറയുന്നത് സ്പോർട്സിനെ പറ്റിയുമാണ്. നായികാപ്രാധാന്യമുള്ള ചിത്രങ്ങൾ സിനിമയിൽ വരുന്നത് തന്നെയാണ് മലയാള സിനിമയിലെ വലിയ മാറ്റം എന്നും പറയാം.
ഒരു കായിക സിനിമ എന്നത് കൊണ്ട് തന്നെ ഒരൊറ്റ കഥാപാത്രത്തിലോ കായിക ഇനത്തിലോ മാത്രം ചിത്രം പിടിച്ചു നിൽക്കാതെ എല്ലാ വിഭാഗവും എക്സ്പ്ലോർ ചെയ്തു എന്നത് തന്നെയാണ് ചിത്രത്തിന്റെ ഏറ്റവും വലിയ ഹൈലൈറ്റ്. ആലീസ് ആയി റെജിഷ മികച്ച പ്രകടനം തന്നെയാണ് കാഴ്ച വച്ചിരിക്കുന്നത്. കഥാപാത്രം ആകുവാൻ വേണ്ടി റെജിഷ സഹിച്ച കഷ്ടപ്പാടുകളും പ്രശംസനീയം തന്നെ. അതെല്ലാം സിനിമയിൽ അതിമനോഹരമായി വന്നിട്ടുണ്ട് എന്നത് തന്നെ ആ കഷ്ടപ്പാടുകൾക്കുള്ള അംഗീകാരം തന്നെയാണ്. നിരഞ്ജ് ചെയ്ത കഥാപാത്രവും അത് പോലെ തന്നെ വലിയ പ്രശസ അർഹിക്കുന്നു. സുരാജ് ഒരിക്കൽ കൂടി ഞെട്ടിച്ചു എന്ന് തന്നെ പറയാം. അത്രയും മനോഹരമായാണ് വർഗീസ് എന്ന കഥാപാത്രം അദ്ദേഹം അവതരിപ്പിച്ചിട്ടുള്ളത്. മറ്റു കഥാപാത്രങ്ങളും തങ്ങളുടെ മികച്ചത് തന്നെ നമുക്ക് നൽകിയിട്ടുണ്ട്.
കൈലാസ് മേനോൻ ഒരുക്കിയ സംഗീതം മുന്നേ തന്നെ ഹിറ്റ് ചർട്ടുകളിൽ ഇടം നേടിയവ ആയിരുന്നു. ചിത്രത്തിലും അതേ ഫീൽ തരാൻ സംഗീത സംവിധായകന് സാധിച്ചിട്ടുണ്ട്. ഛായാഗ്രഹണം നിർവഹിച്ച സുദീപ് എളമൺ ഇടുക്കിയുടെയും മറ്റും ഭംഗി മനോഹരമായി തന്നെ ഒപ്പിയെടുത്തിട്ടുണ്ട്. സിനിമയുടെ ആസ്വാദനം പ്രേക്ഷകരിലേക്ക് എത്തിക്കുന്നതിൽ പ്രധാന പങ്ക് തന്നെ സുദീപ് നിർവഹിച്ച ഛായാഗ്രഹണത്തിന് സാധിച്ചിട്ടുണ്ട്.
സ്പോർട്സ് സിനിമ എന്നത് കൊണ്ട് തന്നെ ശ്രമകരമായ ജോലി ആയിരുന്നിട്ടു കൂടി അതിന്റെ ആസ്വാദന ഭംഗി നഷ്ടപ്പെടുത്താതെയാണ് ഫൈനൽസ് ഒരുക്കിയിട്ടുള്ളത്. സിനിമയുടെ ഓരോ ഭാഗവും മികച്ചത് എന്ന ലേബൽ വരുത്തുന്നതിൽ സംവിധായകൻ നിർവഹിച്ചതും ചെറിയ പങ്ക് അല്ല. ഫൈനൽസ് പി. ആർ അരുൺ എന്ന ഒരു സംവിധായകന്റെ ചിത്രം കൂടിയാണ് എന്നതും തന്റെ അരങ്ങേറ്റം ഭംഗിയാക്കി എന്നതും ചിത്രം കാണുന്ന ശേഷം പ്രേക്ഷകർക്ക് മനസിലാവും എന്നുറപ്പ്.
ഈ ഓണത്തിന് വൻ താരനിര ഇല്ലാതെ പുറത്തിറങ്ങിയ ചിത്രമാണ് ഫൈനൽസ്. മറ്റു ചിത്രങ്ങൾക്കൊപ്പം പരിഗണിക്കേണ്ടതും ഈയൊരു നല്ല കൊച്ചു ചിത്രത്തെ വിജയിപ്പിക്കേണ്ടതും നമ്മുടെ കൂടി കടമായാണ്. നല്ലൊരു സിനിമാറ്റിക് എക്സ്പീരിയസിന് വേണ്ടി ഫൈനൽസിനെ ധൈര്യമായി ഏതൊരു പ്രേക്ഷകനും സമീപിക്കാവുന്നതാണ്.