ജാക്കി എസ് കുമാർ ഒരുക്കി ഇന്ന് തീയേറ്ററുകളിൽ എത്തിയ ചിത്രമാണ് 2 സ്റ്റേറ്റ്സ്. മനു പിള്ള, ശരണ്യ, മുകേഷ്, വിജയരാഘവൻ തുടങ്ങിയവർ പ്രധാന താരങ്ങളാകുന്ന ചിത്രത്തിൽ സുഹൃത്തിന്റെ കല്യാണത്തിനായി അന്യ സംസ്ഥാനത്തു നിന്നും വരുന്ന യുവതിയുമായി പ്രണയത്തിലാകുന്ന യുവാവും തുടർന്നുള്ള സംഭവങ്ങളുമാണ് ചിത്രം പറയുന്നത്‌.
രണ്ടു മണിക്കൂർ ചിരിച്ചുല്ലസിച്ചു എല്ലാം മറന്നു ആഘോഷിക്കാൻ പറ്റിയ രീതിയിലാണ് ചിത്രത്തിന്റെ പോക്ക്. മുകേഷ് അവതരിപ്പിച്ച കഥാപാത്രം ഏറെ കയ്യടി അർഹിക്കുന്നു. കട്ട ഫോമിൽ ഏറെ നാൾ കൂടിയാണ് മുകേഷ് വരുന്നത്. മറ്റു കഥാപാത്രങ്ങളും നന്നായിരുന്നു. മറഡോണക്ക്‌ ശേഷം ശരണ്യ അഭിനയിച്ച ചിത്രമാണ് 2 സ്റ്റേറ്റ്സ്. ശരണ്യയും മനു പിള്ളയും വളരെ മികച്ച പ്രകടനം തന്നെയാണ് കാഴ്ച വെച്ചിരിക്കുന്നത്‌. നേരത്തെ തന്നെ മികച്ച അഭിപ്രായം നേടിയ ജേക്സ്‌ ബിജോയ് ഒരുക്കിയ പാട്ടുകൾ എല്ലാം മികച്ചത് ആയിരുന്നു. സഞ്ജയ് ഹാരിസ് ഒരുക്കിയ ഛായാഗ്രഹണവും ചിത്രത്തിന് ചേർന്ന ഒഴുക്ക് നൽകി.
ഇത്തരം ഒരു ചെറിയ എന്നാൽ വലിയ അർത്ഥതലങ്ങൾ ഉള്ള വിഷയത്തെ മികച്ചതാക്കി അവതരിപ്പിക്കുന്നതിൽ സംവിധായകൻ വിജയിച്ചു എന്നു വേണം പറയാൻ. ചുരുക്കത്തിൽ കുടുംബ പ്രേക്ഷകർക്കും യുവാക്കൾക്കും ഒരുപോലെ ആസ്വദിക്കാവുന്ന ഒരു നല്ല കോമഡി എന്റർടൈനർ ആണ് ചിത്രം.
