മലയാളികളുടെ പ്രിയ അന്യഭാഷ നടൻ അല്ലു അർജുനെ നായകൻ ആക്കി ത്രിവിക്രം ഒരുക്കി ഇന്ന് തീയേറ്ററുകളിൽ എത്തിയ ‘അങ്ങ് വൈകുണ്ഠപുരത്ത്’ വീണ്ടും മറ്റൊരു അല്ലു ഹിറ്റിന് തിരി കൊളുത്തുകയാണ്. അല്ലു അർജുനൊപ്പം മലയാളി താരം ജയറാമും ഗോവിന്ദ് പദ്മസൂര്യയും ചിത്രത്തിലുണ്ട്. വളരെ നാളുകൾക്ക് ശേഷം തന്റെ യഥാർത്ഥ കുടുംബത്തിലേക്ക് തിരിച്ചെത്തുന്ന ബണ്ടുവിന്റെ ജീവിതത്തിൽ ഉണ്ടാവുന്ന ചില സംഭവങ്ങൾ ആണ് സിനിമയുടെ ഇതിവൃത്തം.
ആക്ഷനും ഇമോഷണൽ രംഗങ്ങളിലും മികവ് പുലർത്തി കൊണ്ട് അല്ലു അർജുൻ വീണ്ടും കോരി തരിപ്പിച്ചു. ജയറാം ഉൾപ്പടെയുള്ള മറ്റെല്ലാ താരങ്ങളും കയ്യടി അർഹിക്കുന്ന പ്രകടനങ്ങൾ ആയിരുന്നു. ഛായാഗ്രഹണം, സംഗീതം എന്നിവ ആസ്വാദകന്റെ മനം കവരുന്നവ തന്നെ. തമൻ ഒരുക്കിയ സംഗീതം ചിത്രത്തിന്റെ ഏറ്റവും വലിയ ഹൈലൈറ്റുകളിൽ ഒന്ന് തന്നെ എന്ന് പറയാം. ആക്ഷൻ രംഗങ്ങളിൽ വന്ന പശ്ചാത്തല സംഗീതവും വളരെ മികച്ചത് ആയിരുന്നു. മൊത്തത്തിൽ ഒന്നും ചിന്തിക്കാതെ നേരം കളയാനുള്ള ഒരു മാസ്സ് ആക്ഷൻ തന്നെയാണ് അങ്ങ് വൈകുണ്ഠപുരത്ത്.
ഒരു വർഷത്തെ ഇടവേളയ്ക്ക് ശേഷമുള്ള അല്ലുവിന്റെ വരവ് ഇതിനോടകം തന്നെ ഗംഭീര അഭിപ്രായങ്ങളുമായി ഹിറ്റ് ലിസ്റ്റിൽ ഇടം നേടാൻ ഒരുങ്ങി കഴിഞ്ഞു. 3 മണിക്കൂർ ദൈർഘ്യമുണ്ടെങ്കിലും ഒട്ടും ബോറടിക്കാതെ തന്നെ ചിത്രം കണ്ട് തീർക്കാം.