നവാഗതനായ ജെനിത് കാച്ചപ്പിള്ളി ഒരുക്കി ഇന്ന് തീയേറ്ററുകളിൽ എത്തിയ ചിത്രമാണ് മറിയം വന്നു വിളക്കൂതി. കൃഷ്ണ ശങ്കർ, സൈജു വിൽസൻ, ശബരീഷ്, അൽത്താഫ് സലിം എന്നിവർ കേന്ദ്ര കഥാപാത്രങ്ങൾ ആവുന്ന സിനിമ പറയുന്നത് വ്യത്യസ്തമായ ഒരു കഥയാണ്. സ്റ്റോണർ ഗണത്തിൽ പെടുത്താവുന്ന മലയാളത്തിലെ അപൂർവം ചിത്രങ്ങളിൽ ഒന്നാണ് മറിയം വന്നു വിളക്കൂതി.
തന്റെ ആദ്യ സംവിധാന സംരംഭം മികച്ച എഴുത്തിന്റെ അകമ്പടിയോടെ തന്നെ ഭംഗിയാക്കിയിട്ടുണ്ട് ജെനിത് കാച്ചപ്പിള്ളി. മലയാള സിനിമക്ക് ഒരു കിടിലൻ സംവിധായകൻ കൂടെ ഇതോടെ പിറവികൊണ്ടു എന്ന് പറയാം. അതിനു വലിയ സഹായമാകുവാൻ സിനോജ് അയ്യപ്പൻ ഒരുക്കിയ ഛായാഗ്രഹണത്തിനും സാധിച്ചിട്ടുണ്ട്. ഓരോ പ്രധാന താരങ്ങൾ ഉൾപ്പടെയുള്ള എല്ലാ കഥാപാത്രങ്ങളും തങ്ങളുടെ ഭാഗം വേറെ ലെവലായി തന്നെ ചെയ്തു എന്ന് പറയാം. വസിം – മുരളി എന്നിവർ ചേർന്നൊരുക്കിയ പാട്ടുകളും ഇമ്പമുള്ളവയായിരുന്നു.
തീയേറ്ററിൽ ഉള്ള ചില മണിക്കൂറുകൾ വളരെ നന്നായി ആസ്വദിക്കാൻ നമുക്ക് എപ്പോഴും സാധിക്കാറില്ല. എന്നാൽ മറിയം വന്നു വിളക്കൂതി എന്ന സിനിമ സമ്മാനിക്കുന്നത് മറ്റൊരു ചിന്തയിലേയ്ക്കും നമ്മളെ കൊണ്ട് പോവാതെ സ്ക്രീനിൽ തന്നെ പിടിച്ചിരുത്തുന്ന മണിക്കൂറുകളാണ്. അത് കൊണ്ട് തന്നെ ഒട്ടും നിരാശപ്പെടുത്തില്ല എന്ന കാര്യം ഉറപ്പാണ്. ധൈര്യമായി ടിക്കറ്റ് എടുക്കാം. ആദ്യം മുതൽ അവസാനം വരെ ചിരിച്ച് രസിച്ച് കാണാൻ പറ്റിയ ഒരു കിടിലൻ എന്റർടൈനർ തന്നെയാണ് ചിത്രം.