എ ആർ മുരുഗദോസ് രജിനിയെ നായകൻ ആക്കി ഒരുക്കിയ ദർബാർ ഇന്നാണ് തീയേറ്ററുകളിൽ എത്തുന്നത്. തലൈവർ പടം എന്നത് കൊണ്ട് തന്നെ അതിന്റെ പ്രതീക്ഷകളെ പറ്റി പറയേണ്ടതില്ലല്ലോ. ആദിത്യ അരുണാചലം എന്ന പൊലീസ് ഓഫീസറായിട്ടാണ് രജിനി ചിത്രത്തിൽ എത്തുന്നത്. ഡൽഹിയിൽ നിന്ന് ഒരു മിഷൻ പൂർത്തീകരിക്കാൻ വേണ്ടി മുംബൈയിൽ എത്തുന്ന അരുണാചലം എന്ന ഓഫീസറുടെ സ്വകാര്യജീവിതത്തെ അയാളുടെ ജോലി എത്രമാത്രം ബാധിക്കുന്നു എന്നതാണ് ദർബാർ പറയുന്നത്.
പേട്ട മുതൽ പഴയ ട്രാക്കിലേക്ക് എത്തിയ രജനിയുടെ മറ്റൊരു അഴിഞ്ഞാട്ടം തന്നെയാണ് ദർബാർ. തീയേറ്ററിൽ ഉത്സവലഹരി സൃഷ്ടിക്കാൻ ആ കണ്ണുകൾ തന്നെ ധാരാളമായിരുന്നു. സുനിൽ ഷെട്ടി, നിവേദ തോമസ്, യോഗി ബാബു, നയൻതാര എന്നിവർ മികച്ച പ്രകടനം കാഴ്ച വച്ചു. സുനിൽ ഷെട്ടിയുടെ വില്ലൻ വേഷം കയ്യടി അർഹിക്കുന്നു. പ്രതീക്ഷകൾ തെറ്റിക്കാതെ രജിനിയെ പ്രേക്ഷകർക്ക് തരുന്നതിലും അതോടൊപ്പം സിനിമയിലും ഒരുപോലെ ശ്രദ്ധ കൊടുത്തു മികച്ച ചലച്ചിത്ര അനുഭവം തരാനും മുരുകദോസിന് സാധിച്ചു. സന്തോഷ് ശിവന്റെ ക്യാമറക്കണ്ണുകളിലൂടെ രജിനിയെ കാണാൻ വീണ്ടും സൗന്ദര്യം കൂടി. റിലീസിന് മുന്നേ തന്നെ ഹിറ്റ് ആയ പാട്ടുകൾ കൊണ്ട് തീയേറ്ററിൽ പ്രകമ്പനം സൃഷ്ടിക്കാൻ അനിരുദ്ധിന്റെ മാന്ത്രിക വിരലുകൾക്ക് സാധിച്ചിട്ടുണ്ട്.
മൊത്തത്തിൽ എല്ലാ രജിനി ചിത്രങ്ങളെയും പോലെ തീയേറ്ററിൽ നിന്ന് തന്നെ കണ്ടു അനുഭവിക്കേണ്ട തലൈവർ അഴിഞ്ഞാട്ടം ആണെന്ന് പറയാം ദർബാർ. രജിനി എപ്പടി പോണാറോ… ഒരു വർഷത്തിക്കു അപ്പുറം അപ്പടിയെ തിരുമ്പി വന്തിട്ടേ…!
