ദൃശ്യം 2 ഉടനെ തെലുങ്കിലേക്ക് റീമേക്ക് ചെയ്യുമെന്ന് പ്രഖ്യാപനം. സംവിധായകന് ജീത്തു ജോസഫ് തന്നെയാണ് ഇക്കാര്യം ഔദ്യോഗികമായി വെളിപ്പെടുത്തിയത്. ഫേസ്ബുക്കിലൂടെ ആയിരുന്നു പ്രഖ്യാപനം. നിര്മ്മാതാവ് ആന്റണി പെരുമ്പാവൂർ, നടന് വെങ്കിടേഷ് എന്നിവര്ക്ക് ഒപ്പമുള്ള ചിത്രം പങ്കുവെച്ചായിരുന്നു ജീത്തു ജോസഫ് ദൃശ്യം 2 തെലുങ്കു റിമേക്ക് ആരംഭിക്കാന് പോകുന്ന വിവരം പങ്കുവച്ചത്.
സിനിമയുടെ ചിത്രീകരണം മാര്ച്ചില് തുടങ്ങും എന്നാണ് സൂചന. ജീത്തു തന്നെയാണ് ചിത്രം സംവിധാനം ചെയ്യുന്നത്. ആശിര്വാദ് സിനിമാസാണ് തെലുങ്കിലും ചിത്രം നിര്മ്മിക്കുന്നത്. ആശിര്വാദ് സിനിമാസ് നിര്മ്മിക്കുന്ന ആദ്യ തെലുങ്കു ചിത്രമാണിത്.
2013ല് ദൃശ്യത്തിന്റെ ആദ്യ ഭാഗം പുറത്തിറങ്ങിയ ശേഷം ആദ്യമെത്തിയ റിമേക്ക് കന്നടയില് ദൃശ്യ എന്ന പേരിലായിരുന്നു. അതേ വര്ഷം തന്നെ തെലുങ്കു റിമേക്കുമെത്തി. തുടർന്ന് തമിഴിലും ദൃശ്യം എത്തിയിരുന്നു.
മോഹന്ലാലിന്റെ ജോര്ജ്കുട്ടി തെലുങ്കില് എത്തിയപ്പോള് കഥാപാത്രത്തിന്റെ പേര് രാംബാബു എന്നായിരുന്നു. റാണിയുടെ വേഷം മീന തന്നെയാണ് അവതരിപ്പിച്ചത്. ഐജി ഗീത പ്രഭാകര് നദിയ മൊയ്തുവുമായി. ദൃശ്യം 2 പുറത്തിറങ്ങിയ ആദ്യ ദിവസം തന്നെ തെലുങ്ക് റീമേക്ക് ധാരണ ആയി എന്നാണ് പുറത്ത് വരുന്ന റിപ്പോർട്ടുകൾ.