ഉണ്ണി മുകുന്ദൻ നായകനാകുന്ന മേപ്പടിയാനിലെ ആദ്യ ഗാനം സോഷ്യൽ മീഡിയയിൽ തരംഗമാകുന്നു. അഞ്ജു കുര്യൻ ആണ് സിനിമയിലെ നായിക. കാർത്തിക്, നിത്യ മാമൻ എന്നിവർ ചേർന്ന് ആലപിച്ച ‘കണ്ണിൽ മിന്നും’ എന്ന ഗാനമാണ് പ്രേക്ഷക പ്രീതി നേടി മുന്നേറുന്നത്. ഇതിനോടകം 5 ലക്ഷത്തിൽ പരം ആളുകൾ ആണ് ഗാനം യൂട്യൂബിൽ കണ്ടത്. ജോ പോൾ രചന നിർവഹിച്ച ഗാനത്തിന് ഈണം നൽകിയത് രാഹുൽ സുബ്രമണ്യനാണ്.
വിഷ്ണു മോഹൻ സംവിധാനം ചെയ്യുന്ന സിനിമ നിർമിക്കുന്നത് ഉണ്ണി മുകുന്ദൻ ഫിലിംസ് ആണ്. മേപ്പടിയാൻ തിയറ്ററിൽ റിലീസ് ചെയ്യുമെന്നാണ് പ്രേക്ഷകരുടെ പ്രതീക്ഷ. സിനിമ നല്ലൊരു ഫാമിലി എന്റെർറ്റൈനെർ ആയിരിക്കും എന്നും, നടനെന്ന നിലയിൽ എനിക്ക് വെല്ലുവിളി നൽകിയ കഥാപാത്രമാണിത് എന്നും ഉണ്ണി നേരത്തെ വ്യകതമാക്കിയിരുന്നു.
സിക്സ് പാക്ക് വെടിഞ്ഞാണു ഉണ്ണി മേപ്പടിയാനിലെ ജയകൃഷ്ണനിലേക്കെത്തിയത്. അതേക്കുറിച്ച് ഉണ്ണി സാമൂഹിക മാധ്യമത്തിൽ ഒരു കുറിപ്പും പങ്ക് വച്ചിരുന്നു. മേപ്പടിയാൻ സിനിമയ്ക്ക് മാമാങ്കം ചെയ്തിരുന്ന സമയത്താണ് തന്നെ സമീപിച്ചത് എന്നും, ജയകൃഷ്ണൻ എന്ന കഥാപാത്രത്തിന് അത്തരത്തിലുള്ള ശരീര ഷെയ്പ്പ് ആവശ്യം ഇല്ലെന്ന് സംവിധായകൻ അറിയിച്ചു എന്നും അദ്ദേഹം കുറിപ്പിൽ സൂചിപ്പിക്കുന്നു. തുടർന്നാണ് കഥാപാത്രത്തിന് വേണ്ടി താൻ ആ വെല്ലുവിളി സ്വീകരിച്ചത് എന്നും ഉണ്ണി പറയുന്നു.