രാമലീലക്ക് ശേഷം അരുൺ ഗോപി സംവിധാനം ചെയ്ത് പ്രണവ് മോഹൻലാലിനെ നായകനാക്കി ഒരുക്കുന്ന ചിത്രമാണ് ഇരുപത്തിയൊന്നാം നൂറ്റാണ്ട്. പുലിമുരുകൻ, രാമലീല എന്നീ വമ്പൻ ഹിറ്റുകൾക്ക് ശേഷം ടോമിച്ചൻ മുളകുപ്പാടം നിർമ്മിക്കുന്ന ചിത്രത്തിന്റെ ഫസ്റ്റ് ലുക്ക് പോസ്റ്റർ ഇന്ന് രാവിലെയാണ് പുറത്തിറങ്ങിയത്.
ആരാധകരും സിനിമ താരങ്ങളും മികച്ച പ്രതീക്ഷയോടെ ഇരുകൈയ്യും നീട്ടിയാണ് താരപുത്രന്റെ രണ്ടാം വരവിലെ ആദ്യ ചുവട് എറ്റെടുത്തത്. മലയാള സിനിമയിലെ മുൻനിര താരങ്ങളായ ടോവിനോ തോമസ്, ആസിഫ് അലി, മഞ്ജു വാര്യർ, അജു വർഗ്ഗീസ്, ദിലീപ് തുടങ്ങി പല പ്രമുഖരും ചിത്രത്തിന്റെ പോസ്റ്റർ തങ്ങളുടെ ഔദ്യോഗിക അക്കൗണ്ടിലൂടെ പങ്കുവെച്ചിട്ടുണ്ട്.
2019 ജനുവരിയിലാണ് ചിത്രം തിയേറ്ററുകളിലെത്തുക. ആദ്യ പോസ്റ്ററിന് പിന്നാലെ വരാനിരിക്കുന്ന ചിത്രത്തിന്റെ ടീസറിനും ട്രെയ്ലറിനും ഗാനങ്ങൾക്കുമുള്ള പ്രതീക്ഷയേറിയ കാത്തിരിപ്പ് ഇപ്പോഴെ ആരാധകർ തുടങ്ങിക്കഴിഞ്ഞു.