അൻവർ റഷീദ് സംവിധാനം ചെയ്യുന്ന ഫഹദ് ഫാസിൽ ചിത്രം ട്രാൻസ് ഈ വർഷത്തെ കത്തിരിപ്പുകൾ ഏറിയ ഒരു സിനിമയാണ്. ഉസ്താദ് ഹോട്ടലിന് ശേഷം അൻവർ റഷീദ് സംവിധാനം ചെയ്യുന്ന ചിത്രം, അമൽ നീരദ് ഛായാഗ്രഹണം നിർവഹിക്കുന്ന ചിത്രം, ബാംഗ്ലൂർ ഡേയ്സിന് ശേഷം ഫഹദ് – നസ്രിയ ജോടി ഒന്നിക്കുന്ന ചിത്രം അങ്ങനെ കാത്തിരിക്കാൻ സവിശേഷതകൾ ഏറെയാണ് ട്രാൻസിന്. 70 ദിവസത്തോളം നീളുന്ന നീണ്ട ഷെഡ്യൂൾ ഉള്ള ചിത്രം ഒരു ആന്തോളജി ആണെന്നാണ് ഇപ്പോൾ കിട്ടുന്ന വിവരങ്ങൾ. വിശ്വസനീയമായ വിവരങ്ങൾ എന്ന നിലയ്ക്ക് തന്നെ അഞ്ചു കഥകളിൽ അഞ്ചു കഥാപാത്രങ്ങളായി ഫഹദ് എത്തുമെന്ന് അനുമാനിക്കാം. ചിത്രത്തിന്റെ ഫൈനൽ ഷെഡ്യൂൾ ഇപ്പോൾ നടന്നു കൊണ്ടിരിക്കുകയാണ്.
അമൽ നീരദ് ഛായാഗ്രഹണം നിർവഹിക്കുന്ന ചിത്രത്തിന് വിൻസെന്റ് വടക്കൻ എന്ന നവാഗതൻ കഥയൊരുക്കുന്നു. ശബ്ദ സന്നിവേഷം നടത്തുന്നത് റസൂൽ പൂക്കുട്ടി ആണ്. നസ്രിയ നസിം, സൗബിൻ ഷാഹിർ, ആഷിഖ് അബു, ഗൗതം മേനോൻ, അൽഫോൻസ് പുത്രൻ, വേദിക തുടങ്ങി ക്യാമറയ്ക്ക് മുന്നിലും പിന്നിലും പ്രവർത്തിക്കുന്ന നിരവധി പേർ ചിത്രത്തിൽ പ്രധാന കഥാപാത്രങ്ങൾ ആയി എത്തുന്നു. അൻവർ റഷീദ് തന്നെയാണ് ചിത്രം നിർമിക്കുന്നത്.