ഈ വർഷത്തെ ആദ്യ ബ്ലോക്ബസ്റ്റർ ഹിറ്റുകളിൽ ഒന്നായ അയ്യപ്പനും കോശിയും തെലുഗിലേക്ക്. പൃഥ്വിരാജ്, ബിജു മേനോൻ എന്നിവരെ കേന്ദ്ര കഥാപാത്രങ്ങളാക്കി സച്ചി ഒരുക്കിയ ചിത്രത്തിന്റെ തമിഴ് റീമേക്ക് അവകാശം നേരത്തെ വൻ തുകക്ക് വിറ്റു പോയിരുന്നു. ഇപ്പോഴിതാ പോയ വർഷത്തെ ഏറ്റവും മികച്ച തെലുഗു ചിത്രങ്ങളിൽ ഒന്നായ ‘ജേഴ്സി’യുടെ നിർമ്മാതാവ് സൂര്യദേവര നാഗ വംശിയാണ് ഉയർന്ന തുകക്ക് അയ്യപ്പനും കോശിയും തെലുഗു റീമേക്ക് അവകാശം കരസ്ഥമാക്കിയത്. ജേഴ്സി കൂടാതെ നോൺ – ബാഹുബലി ഇൻഡസ്ട്രി ഹിറ്റ് ആയ അല്ലു അർജുൻ ചിത്രം ‘അലാ വൈകുണ്ഠപുറംലോ’യുടെയും നിർമ്മാണ പങ്കാളികളിൽ ഒരാളാണ് ഇദ്ദേഹം.
കളക്ഷനും ഡിജിറ്റൽ, ടിവി അവകാശം എന്നിവയിലൂടെ 50 കോടി ബിസിനസ്സ് നേരത്തെ തന്നെ കരസ്ഥമാക്കിയ ചിത്രം ഇപ്പോൾ റീമേക്ക് അവകാശത്തിലൂടെ വീണ്ടും ലാഭം കൊയ്യുകയാണ്. ഇനി തമിഴ്, തെലുഗു മേഘലകളിൽ നിന്ന് ആരൊക്കെയാണ് ചിത്രത്തിൽ അഭിനയിക്കാനെത്തുക എന്നറിയാനുള്ള കാത്തിരിപ്പിലാണ് ആരാധകർ.