ആഷിഖ്‌ അബു ഒരുക്കി ടോവിനോ, ഐശ്വര്യ ലക്ഷ്മി എന്നിവർ അഭിനയിച്ച ചിത്രമാണ് ‘മായാനദി’. 2017 ൽ പുറത്തിറങ്ങിയ ചിത്രം വർഷം 3 കഴിഞ്ഞിട്ടും ഇന്നും പ്രേക്ഷകർക്ക്‌ പ്രിയപ്പെട്ടതാണ്. ചിത്രം റിലീസ്‌ ആയതിന് പിന്നാലെ മായാനദിയിൽ പറയാത്ത കഥയെന്ന പേരിൽ ഒരു ഫേസ്‌ബുക്ക്‌ പോസ്റ്റ്‌ വരെ ഏറെ ചർച്ചയായിരുന്നു. ഇപ്പോളിതാ ലോക്ക്‌ഡൗൺ സമയത്ത്‌ ഒരു കൂട്ടം ചെറുപ്പക്കാർ മാത്തന്റെയും അപ്പുവിന്റെയും ജീവിതത്തെ ആസ്പദമാക്കി ഒരു ഇലൂസ്‌ട്രെഷൻ വീഡിയോ ചെയ്തിരിക്കുകയാണ്. കോളേജ്‌ കാലഘട്ടത്തിന് ശേഷം പിരിഞ്ഞ മാത്തന്റെ അപ്പുവിനെ കുറിച്ചുള്ള ഓർമ്മകൾ ആണ് മനോഹരമായ ഹിന്ദി ഗാനത്തിന്റെ പശ്ചാത്തലത്തിലൂടെ ഇല്യൂസ്‌ട്രെഷൻ വീഡിയോ ആയി അവതരിപ്പിച്ചിരിക്കുന്നത്‌.
ശ്യാം മുരളീധരൻ ആണ് വീഡിയോ ചെയ്തിരിക്കുന്നത്‌. വിവേക്‌ രവി ഹിന്ദി ഗാനം എഴുതി, സംഗീതം നിർവഹിച്ച്‌ പാടുകയും ചെയ്തു. രജത്‌ പ്രകാശ്‌ ആണ് സൗണ്ട്‌ എഫക്റ്റ്‌ നിർവഹിച്ചത്‌. യാതൊരു വിധ മുടക്കുമുതലും ഇല്ലാതെ ആണ് വീഡിയോ ഇവർ ഒരുക്കിയിരിക്കുന്നത്‌.
