തെന്നിന്ത്യൻ സിനിമാ പ്രേമികളുടെ ഇഷ്ട നായികയാണ് മീന. ബാലനടിയായി വന്ന് നായികയായി പ്രേക്ഷകരുടെ മനം കവർന്ന താരത്തിനിന്ന് ജന്മദിനമാണ്. 1976 സെപ്തംബർ 16 ന് ചെന്നൈയിലാണ് മീനയുടെ ജനനം. ചെന്നൈ സ്വദേശികളായ ദൊരൈരാജ് മല്ലിക ദമ്പതികളുടെ മകളാണ്. മികച്ച ഭരതനാട്യം നർത്തകികൂടിയാണ് മീന. പിന്നണിഗായികയായും കഴിവുതെളിയിച്ചിട്ടുണ്ട്. സോഫ്റ്റ് വെയർ എഞ്ചിനീയറായ വിദ്യാസാഗറാണ് മീനയുടെ ഭർത്താവ്. മകൾ നൈനിക വിജയുടെ തെറി എന്ന തമിഴ്ചിത്രത്തിലഭിനയിച്ച് പ്രേക്ഷകരെ കയ്യിലെടുത്ത മിടുക്കിയാണ്. കുട്ടിത്താരത്തിന് ഇന്ന് തെന്നിന്ത്യയിൽ ആരാധകരേറെയുണ്ട്. നെഞ്ചങ്ങൾ എന്ന തമിഴ് സിനിമയിൽ ബാലനടിയായി അഭിനയിച്ചാണ് മീന തന്റെ ചലച്ചിത്രജീവിതം തുടങ്ങിയത്. ഒരു പുതിയ കഥൈ എന്ന തമിഴ് സിനിമയിലൂടെ നായികയായി മലയാളത്തിൽ സാന്ത്വനമായിരുന്നു ആദ്യ ചിത്രം.
തമിഴിലും തെലുങ്കിലും തിരക്കേറിയെങ്കിലും മലയാളത്തിലെ സൂപ്പർ താരങ്ങൾ അടക്കമുള്ളവരുടെ നായികയായി താരമെത്തി. മീന- മോഹൻലാൽ ജോഡിയാണ് മലയാളികൾ ഏറെ പ്രിയം. സോഷ്യൽ മീഡിയയിൽ ഏറെ സജീവമല്ല താരം. എങ്കിലും ആരാധകരും സഹതാരങ്ങളുമെല്ലാം ആശംസകൾ നേരുന്നുണ്ട്.
മലയാളത്തിന്റെ സൂപ്പർ സ്റ്റാർ മീനയ്ക്ക് പിറന്നാൾ ആസംസകൾ നേരുന്ന പോസ്റ്റ് ഇപ്പോൾ ട്രെന്റായിട്ടുണ്ട്. ജന്മദിനം നേരുന്നതോടൊപ്പം ദൃശ്യം 2 വിന്റെ സെറ്റിലേക്ക് സ്വാഗതം ചെയ്തായിരുന്നു മോഹൻലാലിന്റെ പോസ്റ്റ്. മീന മോഹൻലാൽ കോമ്പിനേഷനിലെത്തിയ കിടിലൻ ത്രില്ലറായിരുന്നു ദൃശ്യം.
ആരാധകര്‍ ഏറെ ആകാംക്ഷയോടെ കാത്തിരിക്കുന്ന ദൃശ്യം രണ്ട് ചിത്രീകരണം തൊടുപുഴയിലാണ്. ജീത്തു ജോസഫ് തന്നെയാണ് ദൃശ്യം രണ്ടും സംവിധാനം ചെയ്യുന്നത്. 2013ലെ ചിത്രത്തിന്റെ തുടര്‍ച്ചായായ ചിത്രം ക്രൈം ത്രില്ലര്‍ തന്നെയാകും എന്നാണ് അറിയിച്ചിരിക്കുന്നത്.
