അല്ലു അർജുനും ഫഹദ് ഫാസിലും ഒന്നിക്കുന്ന ‘പുഷ്‌‌പയുടെ’ സംഘട്ടന രംഗവും ചോർന്നു. ചിത്രത്തിലെ ആദ്യ ഗാനം നിശ്ചയിച്ചുറപ്പിച്ച സമയത്തിനും മുൻപേ റിലീസായത് ഏറെ വിവാദം സൃഷ്ടിച്ചിരുന്നു. പിന്നാലെയാണ് സംഘട്ടന രംഗവും ചോർന്നത്. അല്ലു അർജുൻ വില്ലൻമാരെ ഇരുമ്പ് കസേര കൊണ്ട് അടിക്കുന്ന പുഷ്പയിലെ ചില രംഗങ്ങളാണ് ഇപ്പോൾ സമൂഹമാധ്യമങ്ങളിൽ പ്രചരിക്കുന്നത്.
പുഷ്‌‌പയുടെ നിർമ്മാതാക്കളായ മൈത്രീ മൂവീ മേക്കേഴ്സ് സംഘട്ടന രംഗം ചോർന്നതിനെക്കുറിച്ച് അന്വേഷിക്കണമെന്നാവശ്യപ്പെട്ടുകൊണ്ട് സൈബർ ക്രൈം പോലീസിൽ പരാതി നൽകിയിട്ടുണ്ട്.
രണ്ട് ഭാഗങ്ങളായി റിലീസ് ചെയ്യുന്ന പുഷ്പയിലെ ആദ്യ ഭാഗത്തിലെ ചില രംഗങ്ങളാണ് ചോർന്നത്. ദേവിശ്രീ പ്രസാദാണ് സംഗീത സംവിധായകൻ. പുറത്തിറങ്ങിയ ചിത്രത്തിലെ ആദ്യ ഗാനത്തിന് സമ്മിശ്ര പ്രതികരണമാണുള്ളത്. രശ്‌മിക മന്ദാനയാണ് പുഷ്പയിലെ നായിക.സുകുമാർ സംവിധാനം ചെയ്യുന്ന ചിത്രം ക്രിസ്‌മസിന് തിയേറ്ററുകളിലെത്തിക്കാനാണ് പദ്ധതി. തെലുങ്ക്, മലയാളം, ഹിന്ദി, തമിഴ്, കന്നഡ എന്നിങ്ങനെ അഞ്ച് ഭാഷകളിലാണ് സുകുമാര്‍ ചിത്രം റിലീസ് ചെയ്യുന്നത് എന്നാണ് റിപ്പോർട്ടുകൾ.