തമിഴകത്ത് മാത്രമല്ല മലയാളികളുടെ ഇടയിലും വലിയൊരു ആരാധകവൃന്ദം പ്രിയതാരങ്ങളാണ് വിജയ്യും അജിത്തും. ഇരുവരും ഒന്നിച്ചുള്ള ഒരു പഴയകാല വീഡിയോ ആണ് ഇപ്പോള് ആരാധകർ ഏറ്റെടുത്തിരിക്കുന്നത്. ഒരു സ്വകാര്യചടങ്ങിനിടെ കണ്ടുമുട്ടിയ ഈ താരങ്ങള് പരസ്പരം സൗഹൃദം പങ്കിടുന്നതിന്റെ നിമിഷങ്ങളാണ് വീഡിയോയില് ഉള്ളത്. അജിത്തിനൊപ്പം ശാലിനിയും മകള് അനൗഷ്കയുമുണ്ട്, വിജയിക്കൊപ്പം ഭാര്യ സംഗീതയും.
കുഞ്ഞു അനൗഷ്കയെ കൈകളിലെടുത്ത് കൊഞ്ചിക്കുന്ന വിജയിയെയും വീഡിയോയില് കാണാം. ഇളയ ദളപതിയും തലയും ഒന്നിച്ചുള്ള ഈ വീഡിയോ ഇതിനകം തന്നെ വൈറലായി കഴിഞ്ഞു.
എച്ച് വിനോദിന്റെ ‘വാലിമൈ’ എന്ന ചിത്രമാണ് അജിത്തിന്റേതായി ഇനി റിലീസിനെത്താനുള്ള സിനിമ. വിനോദ്-ബോണി കപൂര് എന്നിവര്ക്കൊപ്പം ചേര്ന്നുള്ള അജിത്തിന്റെ രണ്ടാമത്തെ സംരംഭമാണ് ‘വാലിമൈ’. ‘പിങ്കി’ന്റെ തമിഴ് റീമേക്ക് ആയ ‘നേര്കൊണ്ട പാര്വൈ’ എന്ന ചിത്രത്തിനു വേണ്ടി കഴിഞ്ഞ വര്ഷം മൂവരും ഒന്നിച്ചിരുന്നു. ‘വാലിമൈ’യില് പൊലീസ് ഓഫീസറുടെ വേഷത്തിലാണ് അജിത്ത് എത്തുന്നത്.
നെല്സണ് ദിലീപ് കുമാര് സംവിധാനം ചെയ്യുന്ന ചിത്രത്തിലാണ് വിജയ് അടുത്തതായി അഭിനയിക്കുക. പൂജ ഹെഗ്ഡെയും ചിത്രത്തിലുണ്ട്. സണ് പിക്ച്ചേഴ്സാണ് ചിത്രം ഒരുക്കുന്നത്.