മിഥുൻ മാനുവൽ തോമസ് കഥയെഴുതി ഒരുക്കി ഇന്നലെ തിയേറ്ററുകളിലെത്തിയ അഞ്ചാം പാതിരാ ആദ്യ ഷോ മുതൽ ഗംഭീര അഭിപ്രായങ്ങളുമായി ജൈത്രയാത്ര തുടരാൻ ഒരുങ്ങി കഴിഞ്ഞു. കുഞ്ചാക്കോ ബോബൻ പ്രധാന താരമായി എത്തുന്ന ചിത്രം വ്യത്യസ്തനായ ഒരു കുറ്റാന്വേഷകന്റെ കുറ്റാന്വേഷണ കഥയാണ്. ആദ്യ ഷോ മുതൽ സോഷ്യൽ മീഡിയകളിൽ വരുന്ന അഭിപ്രായങ്ങൾ നോക്കിയാൽ മനസിലാകും ഇത് എല്ലാ മലയാള സിനിമയ്ക്കും ലഭിക്കുന്ന ഒന്നല്ല. ഒരു നെഗറ്റീവ് റിവ്യൂ പോലും ഇല്ലാതെ ഒരു ത്രില്ലർ സിനിമ ഇന്ന് വന്നിട്ടുണ്ടെങ്കിൽ അത് വഴി വെട്ടുന്നത് ഇനിയും മികച്ച ത്രില്ലറുകൾ മലയാളത്തിൽ ഉണ്ടാകാനുള്ള പ്രോത്സാഹനം തന്നെയാണ്.
ഇന്നലെയും ഇന്നുമായി നിരവധി എക്സ്ട്രാ ഷോകൾ ആണ് പല തീയേറ്ററുകളും ആഡ് ചെയ്തത്. ഇനിയും ഷോ കൗണ്ട് കൂട്ടണം എന്ന പ്രേക്ഷക അഭിപ്രായങ്ങളും വന്നു കൊണ്ടിരിക്കുന്നു. കൂടാതെ പുതിയ പല തിയേറ്ററുകളിൽ കൂടി ചിത്രം റിലീസ് ചെയ്യുന്നു. മെമ്മറീസ്, മുംബൈ പോലീസ് തുടങ്ങിയ കുറ്റാന്വേഷണ പരമ്പരയ്ക്ക് ശേഷം ഈ ഒരു ജോണറിൽ മറ്റൊരു തരംഗം സൃഷ്ടിക്കാനും തുടക്കം കുറിക്കാനും അഞ്ചാം പാതിരാക്ക് കഴിഞ്ഞിട്ടുണ്ട്. 2020ലെ ആദ്യ ബ്ലോക്ബസ്റ്റർ ഹിറ്റ് എന്ന പട്ടത്തിലേക്കാണ് ഇപ്പോൾ സിനിമയുടെ കുതിപ്പ്.