അയ്യപ്പനും കോശിയും എന്ന സൂപ്പര്‍ഹിറ്റ് മലയാള ചിത്രത്തിന്റെ തെലുങ്ക് റീമേക്ക് ‘ഭീംല നായകിന്റെ’ ടൈറ്റിൽ ഗാനം പുറത്ത്. പവൻ കല്യാണിന്റെ ജന്മദിനത്തിലാണ് ചിത്രത്തിന്റെ ടൈറ്റില്‍ ഗാനം റിലീസ് ചെയ്തിരിക്കുന്നത് എന്ന പ്രത്യേകതയുമുണ്ട്.
രാമജോഗയ്യ ശാസ്ത്രിയുടെ വരികള്‍ക്ക് സംഗീതം പകര്‍ന്നിരിക്കുന്നത് തമന്‍.എസ് ആണ്. സംഗീത സംവിധായകനൊപ്പം ശ്രീ കൃഷ്ണ, പൃഥ്വി ചന്ദ്ര, റാം മിരിയാള എന്നിവരാണ് ആലാപനം. ‘അയ്യപ്പനും കോശി’യിലെ ടൈറ്റില്‍ സോംഗ് ഏറെ പ്രേക്ഷകശ്രദ്ധ ആര്‍ജ്ജിച്ച ഒന്നായിരുന്നു. സാഗര്‍ കെ.ചന്ദ്ര സംവിധാനം ചെയ്യുന്ന ചിത്രത്തില്‍ സംഭാഷണങ്ങള്‍ ഒരുക്കുന്നത് ത്രിവിക്രം ശ്രീനിവാസ് ആണ്.
മലയാളത്തിൽ മിന്നുന്ന വിജയം കൊയ്ത ചിത്രമായിരുന്നു സച്ചി സംവിധാനം ചെയ്ത് ബിജു മേനോനും, പൃഥ്വിരാജും തകർത്തഭിനയിച്ച അയ്യപ്പനും കോശിയും. രണ്ട് ടൈറ്റില്‍ കഥാപാത്രങ്ങള്‍ക്കും ഒരുപോലെ പ്രാധാന്യമുള്ള ചിത്രമായിരുന്നു അയ്യപ്പനും കോശിയുമെങ്കില്‍ തെലുങ്കില്‍ പവന്‍ കല്യാണിന്റെ കഥാപാത്രത്തിനായിരിക്കും കൂടുതല്‍ പ്രാധാന്യം. പവൻ കല്യാണിന്റെ ആരാധകരെ കയ്യിലെടുക്കാനുള്ള ചേരുവകളൊക്കെ ചിത്രത്തിൽ ഉണ്ടായിരിക്കും. പൃഥ്വിരാജിന്റെ കഥാപാത്രത്തെ തെലുങ്കില്‍ അവതരിപ്പിക്കുന്ന റാണ ദഗുബാട്ടിയാണ്. കോവിഡ് രണ്ടാം തരംഗത്തെ തുടര്‍ന്ന് നിര്‍ത്തിവച്ചിരുന്ന ചിത്രീകരണം ജൂലൈ അവസാനം പുനരാരംഭിച്ചിരുന്നു. 2022 സംക്രാന്തി റിലീസ് ആയി ചിത്രം തിയറ്ററുകളില്‍ എത്തിക്കാനാണ് നിര്‍മ്മാതാക്കളുടെ പദ്ധതി.