അനാർക്കലി എന്ന സിനിമക്ക് ശേഷം തന്റെ രണ്ടാം സംവിധാന സംരഭത്തിന്റെ ഒരുക്കത്തിലാണ് തിരക്കഥാകൃത്തും സംവിധായകനും കൂടിയായ സച്ചി. ആദ്യ പടത്തിലെ മുഖ്യ കഥാപാത്രങ്ങൾ തന്നെയാണ് ഇതിലും അഭിനയിക്കുന്നത്. അയ്യപ്പൻ നായർ എന്ന അട്ടപ്പാടി സ്റ്റേഷനിലെ S.I ആയി ബിജു മേനോനും കോശി എന്ന റിട്ടയേർഡ് പട്ടാളക്കാരനായി പൃഥ്വിരാജുമാണ് എത്തുന്നത്. അടുത്ത മാസം ചിത്രീകരണം ആരംഭിക്കുമെന്ന് കരുതുന്ന സിനിമയുടെ മുഖ്യ ഭാഗവും അട്ടപ്പാടി പരിസര പ്രദേശങ്ങളിൽ ആയിരിക്കും ഷൂട്ട് ചെയ്യുക.
ഈയിടെ ഒരു മാധ്യമത്തിന് നൽകിയ അഭിമുഖത്തിൽ സംവിധായകൻ സിനിമയെ കുറിച്ച് പറഞ്ഞത്, അയ്യപ്പനും കോശിയും തന്റെ ആദ്യ റിയൽ മാസ്സ് ആക്ഷൻ ചിത്രമായിരിക്കും എന്നാണ്. തന്റെ മുൻ സിനിമകളിലൊന്നും നായകൻ 10 പേരെ തല്ലി തോൽപ്പിക്കുന്ന തരം സീനുകളില്ല. പക്ഷെ അയ്യപ്പനും കോശിയിലും അതിന് തക്കതായ സീനുകളുണ്ട് എന്ന് സച്ചി പറയുന്നു.
ടൈറ്റിൽ കഥാപാത്രങ്ങൾ തമ്മിലുള്ള ഒരു നിയമ പ്രശ്നം അവരുടെ സ്വഭാവം കൊണ്ട് പിന്നീട് വലിയ ഒരു പ്രശ്നത്തിലേക്ക് പോകുന്നതുമാണ് സിനിമയുടെ ഇതിവൃത്തം. സംവിധായകൻ രഞ്ജിതും സുഹൃത്ത് ശശിധരനും ചേർന്ന് ആയിരിക്കും സിനിമ നിർമ്മിക്കുന്നത്. യുവ ഛായാഗ്രാഹകൻ സുദീപ് എളമൺ ചിത്രത്തിന്റെ ഛായാഗ്രഹണം നിർവഹിക്കും. ജേക്സ് ബിജോയ് ആണ് ചിത്രത്തിന്റെ സംഗീതം നിർവഹിക്കുന്നത്.