മലയാളികൾക്ക് ഏറെപ്രിയപ്പെട്ട ചിത്രങ്ങളിലൊന്നാണ് മണിച്ചിത്രത്താഴ്. ചിത്രത്തിൽ നാഗവല്ലിയെന്ന കഥാപാത്രമായി തകർത്താടിയ ശോഭനയെ ആരാധകർ ഒരുകാലത്തും മറക്കില്ല. അഭിനയം മാത്രമല്ല നാഗവല്ലിയുടെ തമിഴ് ഡയലോഗുകൾക്കും ആരാധകരേറെയാണ്.
എന്നാൽ നാഗവല്ലിയുടെ ശബ്ദം ശോഭനയ്ക്ക് പകർന്നു നൽകിയതാരെന്ന് ആടുത്തകാലം വരെ ആരും തിരിച്ചറിഞ്ഞില്ലായിരുന്നു. തമിഴകത്തുനിന്നെത്തിയ ദുർഗയെന്ന കലാകാരിയാണ് ആ ശബ്ദത്തിനു പിന്നിൽ. സാങ്കേതിക പ്രശ്നങ്ങൾ കാരണം സിനിമയുടെ ടൈറ്റിലിൽ ദുർഗയുടെ പേര് ചേർക്കാൻ കഴിഞ്ഞില്ലെന്നാണ് സംവിധായകൻ ഫാസിൽ പറയുന്നത്.
ബിഗ് ബോസിലൂടെ ശ്രദ്ധിക്കപ്പെട്ട ദയ അശ്വതിയും സീരിയൽ താരമായ ജയനും ദുർഗയെക്കുറിച്ച് സമൂഹമാധ്യമത്തിൽ കുറിപ്പെഴുതിയിരുന്നു. അതിലൂടെ കൂടുതൽ ആളുകളിലേക്ക് ഈ കലാകാരിയുടെ പേര് എത്തിക്കഴിഞ്ഞു. നാഗവല്ലിക്ക് ശബ്ദം കൊടുത്തയാളെക്കുറിച്ചുള്ള ചര്‍ച്ചകള്‍ വീണ്ടും ഉയരുകയാണ് ഇപ്പോൾ.