മലയാളത്തിലും തമിഴിലും ഒരുപോലെ തിളങ്ങി നിൽക്കുന്ന സംഗീത സംവിധായകൻ ജേക്സ് ബിജോയ് ഹിന്ദിയിലേക്ക് ചുവട് വെക്കുന്നു. ജി അശോക് സംവിധാനം ചെയ്യുന്ന ‘ദുർഗാവതി’ എന്ന സിനിമയിലൂടെയാണ് ജേക്സ് ബിജോയ് ബോളിവുഡിൽ അരങ്ങേറ്റം കുറിക്കുന്നത്. സിനിമയിൽ ബാക്ഗ്രൗണ്ട് സ്കോർ ആണ് ജേക്സ് നിർവഹിക്കുന്നത്. ഗാനങ്ങൾ ഒരുക്കുന്നത് ഷങ്കർ ഇഹ്സാൻ ലോയ് സംഘമാണ്. ജി അശോക് തന്നെ സംവിധാനം നിർവഹിച്ച് 2018 ൽ പുറത്തിറങ്ങിയ ഹൊറർ ചിത്രം ‘ബാഗമതി’യുടെ റീമേക്ക് ആണ് ദുർഗാവതി. അനുഷ്ക ഷെട്ടി അവതരിപ്പിച്ച വേഷം ഹിന്ദിയിൽ ചെയ്യുന്നത് ഭൂമി പട്നേകർ ആണ്. ടി സീരീസിന്റെ ബാനറിൽ ഭൂഷൻ കുമാർ, അക്ഷയ് കുമാർ എന്നിവർ ചേർന്നാണ് സിനിമ നിർമ്മിക്കുന്നത്. ഡിസംബർ 11ന് ആമസോൺ പ്രൈമിലൂടെ OTT റിലീസ് ആയിട്ടാകും സിനിമ റിലീസ് ചെയ്യുക.
അതേസമയം, അയ്യപ്പനും കോശിയും എന്ന സിനിമയുടെ വിജയത്തിന് പിന്നാലെ പൃഥ്വിരാജും ജേക്സും വീണ്ടും ഒന്നിക്കുന്ന 2 പുതിയ സിനിമ അണിയറയിൽ ഒരുങ്ങുകയാണ്. ഇർഷാദ് പരാരി ഒരുക്കുന്ന അയൽവാശിയും മറ്റൊരു ഇനിയും പ്രഖ്യാപിച്ചിട്ടില്ലാത്ത ചിത്രവുമാണ് ഈ കൂട്ടുകെട്ടിൽ നിന്ന് വരാനിരിക്കുന്ന സിനിമകൾ.