അയ്യപ്പനും കോശിയും എന്ന ഹിറ്റ് ചിത്രത്തിന് ശേഷം മറ്റൊരു പൃഥ്വിരാജ് ചിത്രത്തിന് കൂടി സംഗീതമൊരുക്കാൻ ജേക്സ് ബിജോയ്. പൃഥ്വിയുടെ സംവിധാന സഹായി കൂടി ആയ ഇർഷാദ് പരാരി ഒരുക്കുന്ന അയൽവാശി എന്ന സിനിമയിലാണ് ഇനി ജേക്സ് സംഗീതമൊരുക്കുക. അയ്യപ്പനും കോശിയിലെ പാട്ടുകൾക്കും പശ്ചാത്തല സംഗീതത്തിനും മികച്ച അഭിപ്രായങ്ങൾ ആയിരുന്നു ലഭിച്ചത്. മുൻപ് പൃഥ്വിരാജ് ചിത്രമായ രണത്തിനു വേണ്ടി ഒരുക്കിയ ടൈറ്റിൽ സോങ് ഇന്നും മലയാളത്തിലെ മികച്ച ടൈറ്റിൽ ഗാനങ്ങളിൽ ഒന്നാണ്.
നിലവിൽ ആടുജീവിതം ഷൂട്ടിംഗുമായി ബന്ധപ്പെട്ട് വിദേശത്തുള്ള പൃഥ്വി അതു കഴിഞ്ഞ് ആയിരിക്കും അയൽവാശി തുടങ്ങുക എന്നറിയുന്നു. പൃഥ്വിയോടൊപ്പം ചേട്ടൻ ഇന്ദ്രജിത്തും ഒരു പ്രധാന വേഷത്തിലെത്തുന്ന സിനിമയാണിത്. അയ്യപ്പനും കോശിയും കൂടാതെ മാഫിയ, ഫോറൻസിക് എന്നീ സിനിമകൾ കൂടി ജേക്സിന്റെതായി ഫെബ്രുവരിയിൽ പുറത്തിറങ്ങുകയുണ്ടായി. ജേക്സ് എന്ന സംഗീത സംവിധായകന്റെ കഴിവ് അടിവരയിടുന്നതായിരുന്നു എല്ലാം എന്ന് സിനിമ കണ്ട ഏതൊരു പ്രേക്ഷകനും പറയും.