ജോജു ജോര്‍ജ്, നരേന്‍, ഷറഫുദ്ദീന്‍ എന്നിവർ കേന്ദ്ര കഥാപാത്രങ്ങളാകുന്ന ബിഗ് ബജറ്റ് സിനിമ ഒരുങ്ങുന്നു. സാക് ഹാരിസ് എന്ന നവാഗത സംവിധായകനാണ് ചിത്രം സംവിധാനം ചെയ്യുന്നത്. ആത്മീയ രാജന്‍, കായല്‍ ആനന്ദി, അനു കൃതി വാസ് എന്നിവരാണ് ചിത്രത്തിലെ നായികാ കഥാപാത്രങ്ങളെ അവതരിപ്പിക്കുന്നത്.
യു.എന്‍ ഫിലിം ഹൗസ്, ജുവിസ് പ്രൊഡക്ഷന്‍സ് ചേര്‍ന്നാണ് ചിത്രത്തിന്റെ നിര്‍മ്മാണം. ചിത്രത്തിന് വേണ്ടി സംഗീതം ഒരുക്കുന്നത് രഞ്ജിന്‍ രാജാണ്. പ്രതാപ് പോത്തന്‍, ജോണ്‍ വിജയ്, മുനിഷ്‌കാന്ത്, വിനോദിനി, അഞ്ജലി റാവു തുടങ്ങിയവര്‍ ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നു.
ചെന്നൈയും കൊച്ചിയുമാണ് ചിത്രത്തിന്റെ പ്രധാന ലൊക്കേഷനുകള്‍. ഇതിൽ നിന്ന് സിനിമ മെട്രോ നഗരത്തെ കേന്ദ്രീകരിക്കുന്ന കഥ ആയിരിക്കും പറയുക എന്ന് ഊഹമാണ് പുറത്ത് വരുന്നത്. ചിത്രത്തിന്റെ പേരും അണിയറ പ്രവര്‍ത്തകരെപ്പറ്റിയുള്ള വിവരങ്ങളും ഉടന്‍ അറിയിക്കുമെന്ന് സംവിധായകന്‍ അറിയിച്ചു.