മലയാളികളുടെ പ്രിയ സംവിധായകരിലൊരാളാണ് ലാൽ ജോസ്. 1998 ല്‍ മമ്മൂട്ടി നായകനായ ഒരു മറവത്തൂർ കനവിലൂടെയാണ് അദ്ദേഹം സംവിധായകനാകുന്നത്. ഇപ്പോൾ വർഷങ്ങൾക്ക് ശേഷം മ്മൂട്ടിയെക്കുറിച്ചുള്ള ചില കാര്യങ്ങൾ വെളിപ്പെടുത്തിയിരിക്കുകയാണ് ലാൽജോസ്. അഴകിയ രാവണന്‍ എന്ന ചിത്രത്തിന്റെ സെറ്റില്‍ വെച്ചാണ് മമ്മൂട്ടിയെ പരിചയപ്പെടുന്നത്. താൻ സംവിധാനം ചെയ്യാന്‍ ഒരുങ്ങുന്ന സമയത്ത് നായകനായി അഭിനയിക്കാമെന്ന് അദ്ദേഹം ഇങ്ങോട്ട് പറയുകയായിരുന്നു. ആദ്യ ചിത്രത്തില്‍ നായകനാക്കിയില്ലെങ്കില്‍ പിന്നെ ജീവിതത്തില്‍ ഡേറ്റ് തരില്ല എന്നും പറഞ്ഞിരുന്നു.
എന്നാൽ താനും വിട്ടുകൊടുത്തില്ല എന്നാണ് ലാൽജോസ് പറയുന്നത്. മെഗാസ്റ്റാർ വാശിപിടിച്ച സമയങ്ങളിലെല്ലാം തന്നെ തിരിച്ചും അതേ വാശി കാണിച്ചിരുന്നു. മറ്റൊരു നടനായിരുന്നെങ്കിൽ ഇന്ന് അക്കാര്യങ്ങളെല്ലാം മനസ്സില്‍ വൈരാഗ്യമായി സൂക്ഷിച്ചേനെയെന്നും സംവിധായകൻ പറയുന്നു.
പക്ഷെ മമ്മൂട്ടി അത്തരത്തിൽ പെരുമാറിയിരുന്നില്ല. തർക്കങ്ങളെല്ലാം വേണ്ടതുപോലെ മനസിലാക്കി എടുത്ത് വിട്ടുകളയുകയായിരുന്നു. പിന്നീട് തോളിൽ വന്ന് കയ്യിടുകയും ചെയ്യുമായിരുന്നുവെന്നും ലാൽ ജോസ് ഓർക്കുന്നു.