ആൻഫീൽഡിൽ ഇനിയും ആഘോഷങ്ങൾ അവസാനിച്ചിട്ടുണ്ടാകില്ല. കാരണം ഇത് അവർ എഴുതിയ ചരിത്രമാണ്. ഫുട്ബോൾ ലോകം കണ്ട എക്കാലത്തെയും മികച്ച തിരിച്ചുവരവുമായി ലിവർപൂൾ ചാമ്പ്യൻസ് ലീഗ് ഫൈനലിൽ പ്രവേശിച്ചു. ആദ്യ പാദ സെമി ഫൈനലിൽ 3-0 ന്റെ ലീഡുമായി വന്ന ബാഴ്സലോണയെ ക്ലോപ്പിന്റെ ചുണക്കുട്ടികൾ ആൻഫീൽഡിൽ തകർത്തുവിട്ടു. ആദ്യ പാദത്തിൽ 3 ഗോളിന്റെ ലീഡ് വഴങ്ങിയ ലിവർപൂൾ ഇങ്ങനെയൊരു തിരിച്ചുവരവ് നടത്തുമെന്ന് ഫുട്ബോൾ ആരാധകർ ആരും കരുതിയിട്ടുണ്ടാകില്ല, ലിവർപൂൾ ആരാധകർ ഒഴികെ ആരും! കാരണം അവർക്കറിയാം കളി ആൻഫീൽഡിൽ ആണ് അവിടെ അത്ഭുതം സംഭവിക്കും എന്നത്.
![](https://i0.wp.com/10gmedia.com/wp-content/uploads/2019/05/IMG_1523-1024x683.jpg?resize=696%2C464)
കളി തുടങ്ങി 7ആം മിനുറ്റിൽ ഒറിഗിയാണ് ഗോൾ വേട്ടക്ക് തുടക്കമിട്ടത്. ആദ്യ ഗോൾ മുതൽ തന്നെ അറ്റാകിംഗ് തുടർന്നുകൊണ്ടിരുന്ന ലിവർപൂൾ ആദ്യ പകുതി അവസാനിക്കുന്നത് വരെ 1-0 ന്റെ ലീഡിൽ ആയിരുന്നു. എന്നാൽ രണ്ടാം പകുതിയിൽ പകരക്കാരനായി ഇറങ്ങിയ വൈനാൽഡം ബാഴ്സയെ ഞെട്ടിച്ച് 2 മിനുറ്റിനുള്ളിൽ 2 തകർപ്പൻ ഗോളുമായി ലിവർപൂളിനെ ഒപ്പമെത്തിച്ചു. 54,56 എന്നീ മിനുറ്റുകളിൽ ആയിരുന്നു വൈനാൽഡത്തിന്റെ ഗോളുകൾ. ഇതോടെ അഗ്രിഗേറ്റ് സ്കോർ 3-3 ആയി. 79ആം മിനുറ്റിൽ ഒറിഗി ബാഴ്സയുടെ മേലെ അവസാന ആണിയും അടിച്ചതോടെ ആൻഫീൽഡ് പൂരപ്പറമ്പിന്റെ പ്രതീതിയായി. ഒരുപക്ഷെ അതിനേക്കാൾ ഗംഭീരം എന്ന് തന്നെ പറയാവുന്ന പ്രതീതി!
![](https://i0.wp.com/10gmedia.com/wp-content/uploads/2019/05/IMG_1519-1024x683.jpg?resize=696%2C464)
ഇത് തുടർച്ചായ രണ്ടാം തവണയാണ് ലിവർപൂൾ ചാമ്പ്യൻസ് ലീഗ് ഫൈനലിൽ പ്രവേശിക്കുന്നത്. കഴിഞ്ഞ തവണ ഫൈനലിൽ കടന്നെങ്കിലും റയൽ മാഡ്രിഡിനോട് തോൽക്കുകയായിരുന്നു. ഇത്തവണ ക്ലോപ്പിന്റെ കുട്ടികൾ ചരിത്രം സൃഷ്ടിക്കുമോ എന്ന് ഉറ്റുനോക്കുകയാണ് ആരാധകരും ഫുട്ബോൾ ലോകവും.
![](https://i0.wp.com/10gmedia.com/wp-content/uploads/2019/05/IMG_1522-1024x563.jpg?resize=696%2C383)