സിനിമയിലും സാധാരണ ജീവിത സാഹചര്യങ്ങളുമായി സാമ്യമുള്ള കഥാപാത്രങ്ങളെ അവതരിപ്പിച്ചാണ് വിജയ് സേതുപതി താരമായി വളർന്നത്. ജീവിതത്തിൽ ലാളിത്യം കാത്തുസൂക്ഷിക്കാൻ അദ്ദേഹം ശ്രമിക്കാറുമുണ്ട്. ഇതിന്റെ പിന്നിലെ കാരണം ഓർക്കുമ്പോൾ ആണ് അദ്ദേഹത്തിന്റെ വെല്ലുവിളികൾ നിറഞ്ഞ പഴയ കാലം പങ്കുവെച്ചത്.
തന്റെ ജീവിത അനുഭവങ്ങളാണ് തന്നെ ഇത്തരത്തില്‍ രൂപപ്പെടുത്തിയതെന്നും അദ്ദേഹം പറഞ്ഞു. സിനിമയില്‍ അവസരത്തിനായി നടക്കുമ്പോൾ ചെന്നൈയിലെ തെരുവുകളില്‍ ഒരു വാടകവീടിന് വേണ്ടി നായയെ പോലെ താന്‍ അലഞ്ഞിട്ടുണ്ടെന്നും ആ അനുഭവത്തില്‍ നിന്നാണ് ആണ്ടവന്‍ കട്ടളെ എന്ന ചിത്രത്തില്‍ അഭിനയിച്ചതെന്നും അദ്ദേഹം പറയുന്നു.
ഞാന്‍ അഭിനയിച്ച കൂടുതല്‍ ചിത്രങ്ങളിലും എന്റെ ജീവിതത്തില്‍ നടന്ന സംഭവങ്ങളുണ്ട്. ഈ അനുഭവങ്ങളാണ് എന്നെ ലാളിത്യത്തോടും വിനയത്തോടും ജീവിക്കാന്‍ പ്രേരിപ്പിക്കുന്നത് എന്നും അദ്ദേഹം പറയുന്നു. സാധാരണക്കാരിൽ ഒരുവനായി ജീവിക്കുന്ന അദ്ദേഹത്തെ ആരാധകർ സ്നേഹത്തോടെ വിളിക്കുന്നതാണ് ‘മക്കൾസെൽവൻ’ എന്ന പേര്.