മമ്മൂട്ടി ചിത്രം ദി പ്രീസ്റ്റിന്റെ തിയറ്റർ റിലീസ് മാറ്റി. ഫെബ്രുവരി 4 നായിരുന്നു സിനിമയുടെ റിലീസ് നിശ്ചയിച്ചിരുന്നത്. എന്നാൽ സെക്കന്റ് ഷോ ഇല്ലാതെ ഉടൻ റിലീസ് വേണ്ടെന്ന തീരുമാനത്തിലാണ് നിർമാതാക്കൾ റിലീസ് മാറ്റിയത് എന്നാണ് വിവരം. സെക്കൻഡ് ഷോ കൂടി ഇല്ലെങ്കിൽ വൻ മുതൽമുടക്ക് ഉള്ള ചിത്രങ്ങളെ കൂടുതൽ ബാധിച്ചേക്കാം എന്ന കണക്കുകൂട്ടലിൽ ആണ് ഈ തീരുമാനം. മമ്മുട്ടിയും മഞ്ജു വാര്യരും അടക്കമുള്ള താരങ്ങൾ എത്തുന്ന സിനിമയാണിത്.
കൊവിഡ് വ്യാപന പശ്ചാത്തലത്തിൽ സെക്കന്റ് ഷോ അനുവദിക്കില്ലെന്ന സർക്കാർ നിയന്ത്രണം ഉള്ളതിനാലാണ് പ്രീസ്റ്റിന്റെ റിലീസ് നീട്ടി വെച്ചത്. രാവിലെ 9 മുതൽ രാത്രി 9 വരെ നിലവിൽ മൂന്ന് ഷോകൾ മാത്രമാണ് തീയേറ്ററുകളിൽ ഇപ്പോൾ അനുവദിച്ചിട്ടുള്ളത്.
ഫെബ്രുവരിയിൽ 12 മലയാള ചിത്രങ്ങളാണ് റിലീസ് നിശ്ചയിച്ചിരുന്നത്. പ്രീസ്റ്റിന് പിന്നാലെ കൂടുതൽ ചിത്രങ്ങൾ റിലീസ് മാറ്റി വെക്കാനുള്ള ആലോചനയിലാണ് എന്നും വിവരങ്ങൾ പുറത്ത് വരുന്നുണ്ട്. കേരളത്തിൽ കൊറോണ വ്യാപനം രൂക്ഷം ആയ സഹചാര്യത്തിൽ ഉടനെ നിയന്ത്രണങ്ങൾ പിൻവലിക്കാൻ സാധ്യത കുറവാണ്. ഇപ്പോൾ മൊത്തം സീറ്റിന്റെ50 ശതമാനം ആളുകളെ മാത്രമാണ് പ്രവേശിപ്പിക്കാൻ അനുമതി.