കൊവിഡ് പ്രതിസന്ധികൾക്കിടയിലും സിനിമാപ്രേമികൾ കാത്തിരിക്കുന്ന ചിത്രമാണ് ദൃശ്യം 2. കഴിഞ്ഞമാസം 21 ന് ചിത്രത്തിന്റെ ഷൂട്ടിംഗ് ആരംഭിച്ചിരുന്നു. പ്രധാന താരങ്ങളെല്ലാം തന്നെ ചിത്രീകരണത്തിനായി എത്തിയിട്ടുണ്ട്. പ്രേക്ഷകരുടെ സ്വന്തം ജോർജുകുട്ടി സൂപ്പർ സ്റ്റാർ മോഹൻ ലാലും സെറ്റിൽ ജോയിൻ ചെയ്തു കഴിഞ്ഞു.
ഇപ്പോഴിതാ ദൃശ്യം 2 ലൊക്കേഷനിലേക്ക് മോഹന്ലാല് കടന്നു വരുന്ന വിഡിയോയാണ് സോഷ്യല് മീഡിയയില് വൈറലാകുന്നത് . താടിവച്ച് വെള്ള ഷര്ട്ടും കറുത്ത പാന്റും ധരിച്ച് സിംപളായി വരുന്ന മോഹന്ലാലിന്റെ വിഡിയോ ആരാധകര് ഇതിനോടകം ഏറ്റെടുത്തുകഴിഞ്ഞു.
ജീത്തു ജോസഫ് തന്നെയാണ് രണ്ടാം ഭാഗവും ഒരുക്കുന്നത്. ആശീർവാദി സിനിമാസിന്റെ ബാനറിൽ ആന്റണി പെരുമ്പാവൂർ ചിത്രം നിർമ്മിക്കും. തൊടുപുഴയിലാണ് ഇപ്പോള് ദൃശ്യം രണ്ടാം ഭാഗത്തിന്റെ ഷൂട്ടിങ് പുരോഗമിച്ചുകൊണ്ടിരിക്കുന്നത്. ദൃശ്യത്തില് അഭിനയിച്ച ഭൂരിഭാഗം താരങ്ങളും നിരവധി പുതിയ താരങ്ങളും ചിത്രത്തിലുണ്ടാകുമെന്നാണ് അണിയറ പ്രവർത്തകർ അറിയിക്കുന്നത്.