എമ്പുരാനെക്കുറിച്ചുളള പുതിയ അപ്ഡേറ്റുമായി എത്തിയിരിക്കുകയാണ് മുരളി ഗോപി. എമ്പുരാൻ അടുത്ത വര്ഷം ആരംഭിക്കുമെന്നാണ് തന്റെ പുതിയ ഫേസ്ബുക്ക് പോസ്റ്റിലൂടെ മുരളി ഗോപി പറയുന്നത്. 2019 ല് പുറത്തിറങ്ങിയ ലൂസിഫര് തിയറ്ററുകളില് വലിയ വിജയം നേടിയിരുന്നു. ഇതിന്റെ രണ്ടാം ഭാഗമായി ആയിരിക്കും എമ്പുരാൻ എത്തുക. മോഹന്ലാലിനെ നായകനാക്കി പൃഥ്വിരാജ് ആദ്യമായി സംവിധാനം ചെയ്ത സിനിമ വമ്പൻ വാണിജ്യ വിജയം നേടിയിരുന്നു. മുരളി ഗോപി ആയിരുന്നു തിരക്കഥ ഒരുക്കിയത്.
ചിത്രത്തില് മഞ്ജു വാര്യര്, വിവേക് ഒബ്റോയ്, പൃഥ്വിരാജ്, ഇന്ദ്രജിത്ത്, ടൊവിനോ തോമസ് ഉള്പ്പെടെയുളള താരങ്ങളും അണിനിരന്നിരുന്നു. അബ്രാം ഖുറേഷി എന്ന അധോലോക നേതാവിന്റെ കഥയാണ് ലൂസിഫര് പറഞ്ഞത്. എമ്പുരാൻ കുറേക്കൂടി വലിയ ക്യാൻവാസിൽ ആയിരിക്കും ഒരുക്കുക എന്ന് സംവിധായകൻ പൃഥ്വിരാജ് വെളിപ്പെടുത്തിയിരുന്നു.