പൃഥ്വിരാജ്‌ – ആഷിഖ് അബു ടീം ആദ്യമായി ഒന്നിക്കുന്ന ‘വാരിയംകുന്നൻ’ എന്ന ബ്രഹ്മാണ്ഡ സിനിമ പ്രഖ്യാപിച്ചു. മലബാർ വിപ്ലവത്തിൽ ബ്രിട്ടീഷുകാർക്കെതിരെ പോരാടിയവരിൽ പ്രധാനിയായിരുന്ന ഏറനാടിന്റെ സുൽത്താൻ എന്നറിയപ്പെട്ട വാരിയംകുന്നത്ത്‌ കുഞ്ഞഹമ്മദ്‌ ഹാജി എന്ന ചരിത്ര പുരുഷന്റെ ജീവിത കഥയാണ് ചിത്രം പറയുന്നത്‌.
അടുത്ത വർഷം മലബാർ വിപ്ലവത്തിന് 100 വയസ്സ്‌ തികയുന്ന സാഹചര്യത്തിൽ സിനിമയുടെ ചിത്രീകരണം തുടങ്ങാൻ ആണ് പദ്ധതി. ‘ഉണ്ട’ എന്ന മമ്മൂട്ടി സിനിമയുടെ എഴുത്തുകാരനായ ഹർഷാദും കൂടെ റമീസും ചേർന്നാണ് ഈ ഇതിഹാസ ചിത്രത്തിന്റെ രചന നിർവഹിക്കുന്നത്‌. ‘വൈറസ്‌’, ‘സുഡാനി ഫ്രം നൈജീരിയ’ തുടങ്ങിയ ചിത്രങ്ങളുടെ സഹ എഴുത്തുകാരനായ മുഹ്സിൻ പരാരി ഈ ചിത്രത്തിൽ ആഷിഖിന്റെ കോ ഡയറക്റ്റർ ആയിരിക്കും. ഷൈജു ഖാലിദ്‌ ഛായാഗ്രഹണം നിർവഹിക്കുന്ന ചിത്രം നിർമ്മിക്കുന്നത്‌ സിക്കന്ദർ, മൊയ്തീൻ എന്നിവർ ചേർന്നാണ്.