ചുരുങ്ങിയ കാലം കൊണ്ടുതന്നെ മലയാള സിനിമയിലെ യുവരാജാവായി അറിയപ്പെട്ടയാളാണ് പൃഥിരാജ്. നടനും നിർമ്മാതാവും, സംവിധായകനും, ഗായകനുമൊക്കയായി പ്രതിഭ തെളിയിച്ച താരം. മോളിവുഡിൽ മാത്രമല്ല തമിഴിലും ബോളിവുഡിലുമെല്ലാം പൃഥി വരവറിയിച്ചിരുന്നു. താരത്തിന് ഇന്ന് മുപ്പത്തിയെട്ടാം ജന്മദിനമാണ്.
കുടുംബാംഗങ്ങളും ആരാധകരും സിനിമാലോകവും ചേർന്ന് സൂപ്പർതാരത്തിന്റെ പിറന്നാൾ ഗംഭീരമാക്കിയിരിക്കുന്നു. നസ്രിയ നസീം, ദുൽഖർ സൽമാൻ, ആസിഫ് അലി, അസ്കർ അലി, ആസിഫ് അലി, ഉണ്ണി മുകുന്ദൻ, അജു വർഗ്ഗീസ്, സംവിധായകനും ഛായാഗ്രഹകനുമായ സുജിത്ത് വാസുദേവ് തുടങ്ങി മലയാളത്തിലെ മുൻനിര യുവതാരങ്ങളും സംവിധായകരുമൊക്കെ പൃഥ്വിയ്ക്ക് ആശംസയുമായി രംഗത്തെത്തിയിട്ടുണ്ട്. സൂപ്പർ സ്റ്റാർ മോഹൻലാലും രഞ്ജിത്തും ഉൾപ്പെടെയുള്ളവർ വീഡിയോ സന്ദേശത്തിലൂടെയാണ് ആശംസകൾ നേർന്നത്.
മലയാളികൾ ഏറെ ഇഷ്ടപ്പെടുന്ന താരകുടുംബമാണ് സുകുമാരന്റേത്. പൃഥ്വിരാജും ഇന്ദ്രജിത്തും അമ്മ മല്ലിക സുകുമാരനും മരുമക്കളായ പൂർണിമ ഇന്ദ്രജിത്തും സുപ്രിയയും കൊച്ചുമക്കളുമൊക്കെ സോഷ്യൽ മീഡിയയിലെ നിറസാന്നിധ്യമാണ്. പൂർണിമയും ഇന്ദ്രജിത്തും അനുജന് ആശംസകൾ അറിയിച്ചിട്ടുണ്ട്. സനേഹാശംസകളോടെ സുപ്രിയയും സോഷ്യൽ മീഡിയയിലെത്തി.
ആരാധകരും ആവേശത്തിലാണ്. ഇഷ്ടനായകന് ജന്മദിനമാശംസിച്ച് വീഡിയോകളടക്കം സോഷ്യൽ മീഡിയയിലെത്തിക്കഴിഞ്ഞു. താരത്തിന്റെ ജന്മദിനത്തിനോടനുബന്ധിച്ച് സന്നദ്ധപ്രവർത്തനങ്ങളുമായി ഫാൻസ് അസോസിയേഷനുകളും സജീവമായി രംഗത്തുണ്ട്.