നടി ആക്രമിക്കപ്പെട്ട കേസിൽ കൂറുമാറിയ താരങ്ങൾക്കെതിരെ പ്രതിഷേധം ഉയരുകയാണ്. സഹതാരങ്ങളുൽപ്പെടെ നിരവധിപ്പേരാണ് സോഷ്യൽ മീഡിയയിലൂടെ ഇവർക്കതിരെ ആഞ്ഞടിച്ചിരിക്കുന്നത്. ഈവിഷയത്തിൽ സിദ്ധിഖിനെതിരെ ആ‍ഞ്ഞടിക്കുകയാണ് നടി രേവതി സമ്പത്ത്. രൂക്ഷമായാണ് രേവതിയുടെ പ്രതികരണം. തന്നോട് മോശമായി പെരുമാറിയിട്ടുള്ള നടന്‍ സിദ്ദിഖിന്റെ കൂറുമാറ്റം അത്ഭുതപ്പെടുത്തുന്നില്ല എന്നാണ് രേവതിയുടെ വെളിപ്പെടുത്തൽ.
കുറിപ്പിന്റെ പൂർണരൂപം;
‘ഇന്‍സര്‍ട്ട് ചെയ്യാന്‍ സമ്മതിച്ചില്ലെങ്കിലും കുഴപ്പമില്ല,ബാക്കിയെങ്കിലും ചെയ്യാന്‍ കിട്ടുമോ’ എന്ന് എന്നോട് ചോദിക്കുകയും മോശമായി പെരുമാറുകയും ചെയ്ത നടന്‍ സിദ്ദിഖിന്റെ കൂറുമാറ്റം അത്ഭുതപ്പെടുത്തുന്നില്ല. ഒരേ തോണിയിലെ യാത്രക്കാര്‍ക്ക് പരസ്പരം കൈ കൊടുക്കാതെ മുന്നോട്ട് പോകാനാകുന്നത് എങ്ങനെയാണ് !!
ഭാമയും ബിന്ദു പണിക്കരും ഇതൊരു ഒറ്റയാള്‍ പോരാട്ടമാണെന്നാണോ ഇതുവരെ കരുതിയത് എന്നറിയില്ല. നിങ്ങളും ഞാനും ഓരോ സ്ത്രീകളും അടങ്ങുന്ന സമൂഹത്തിന്‍്റെ നീതിക്കായുള്ള പോരാട്ടം കൂടിയാണ് ഈ പോരാട്ടം.
പൊരുതുന്ന ആ നടിയെ മാത്രം ഒറ്റയ്ക്കാക്കി സ്വന്തം കാര്യം നോക്കി തിരികെ വരാന്‍ നിങ്ങള്‍ക്ക് എങ്ങനെയാണ് സാധിക്കുന്നത്. ഈ പ്രവര്‍ത്തികൊണ്ട് ചരിത്രത്തിലെ ഒറ്റുകാരുടെ കൂട്ടത്തില്‍ നിങ്ങള്‍ അടയാളപ്പെടും.
സിദ്ദിഖ്, ബിന്ദു പണിക്കര്‍, ഇടവേള ബാബു, ഭാമ – ലജ്ജയില്ലേ !
