ബോളിവുഡ് സൂപ്പർതാരം സഞ്ജയ്ദത്ത് രോഗബാധിതനായതോടെ സിനിമയിൽ നിന്ന് വിട്ടു നിൽക്കുകയായിരുന്നു. എന്നാൽ പ്രതീക്ഷിച്ചതിലും വേഗം തന്നെ താരം സുഖപ്പെട്ട് മടങ്ങിയെത്തിയിരിക്കുകയാണ്. ഈ തിരിച്ചുവരവിൽ സന്തോഷം അറിയിക്കാനും സഞ്ജയ് ദത്ത് മറന്നില്ല. “ഈ യുദ്ധത്തില്‍ വിജയിച്ച് പുറത്തുവന്നതില്‍ സന്തോഷമുണ്ടെന്നാണ് താരം പറഞ്ഞത്.
“കഴിഞ്ഞ കുറച്ച്‌ ആഴ്ചകള്‍ എനിക്കും എന്റെ കുടുംബത്തിനും വളരെ പ്രയാസകരമായ സമയമായിരുന്നു. എന്നാല്‍ അവര്‍ പറയുന്നത് പോലെ, ദൈവം തന്റെ ശക്തരായ പോരാളികള്‍ക്ക് ഏറ്റവും കഠിനമായ യുദ്ധങ്ങള്‍ നല്‍കുന്നു. ഇന്ന്, എന്റെ കുട്ടികളുടെ ജന്മദിനത്തോടനുബന്ധിച്ച്‌, ഈ യുദ്ധത്തില്‍ നിന്ന് വിജയിയായി പുറത്തുവന്നതില്‍ എനിക്ക് സന്തോഷമുണ്ട്, എനിക്ക് കഴിയുന്ന ഏറ്റവും മികച്ച സമ്മാനം അവര്‍ക്ക് നല്‍കാന്‍ കഴിയുന്നു – ഞങ്ങളുടെ കുടുംബത്തിന്റെ ആരോഗ്യവും ക്ഷേമവും,” സഞ്ജയ് ദത്ത് പോസ്റ്റില്‍ കുറിച്ചു.
തന്നെ പരിപാലിച്ച ഡോ. സേവന്തിയോടും അവരുടെ ടീമിലെ ഡോക്ടര്‍മാരോടും നഴ്‌സുമാരോടും കോകിലബെന്‍ ആശുപത്രിയിലെ മെഡിക്കല്‍ സ്റ്റാഫിനോടും, തിരിച്ചുവരാൻ പ്രാർഥിച്ച എല്ലാവരോടും പ്രത്യേകം നന്ദിയറിച്ചായിരുന്നു പോസ്റ്റ്. കെ‌ജി‌എഫ്: ചാപ്റ്റര്‍ 2, ഭുജ്: ദി പ്രൈഡ് ഓഫ് ഇന്ത്യ, പൃഥ്വിരാജ്, ടോര്‍‌ബാസ് തുടങ്ങിയ ചിത്രങ്ങളാണ് ഇനി താരം പൂർത്തിയാക്കാനൊരുങ്ങുന്നത്.
