ക്രിക്കറ്റ് ഇതിഹാസമായ ശ്രീലങ്കൻ താരം മുത്തയ്യ മുരളീധരന്റെ ജീവിതം തമിഴകത്ത് സിനിമയാക്കുന്ന വാർത്തകൾ ഇതിനോടകം വന്നുകഴിഞ്ഞിരുന്നു. സൂപ്പർ താരം വിജയ് സേതുപതിയാണ് മുരളീധരനായി വേഷമിടുന്നത്. എന്നാൽ ചിത്രത്തിനെതിരെ പ്രതിഷേധമാണ് ഇപ്പോൾ ഉയരുന്നത്. സിനിമയ്ക്കെതിരേയും വിജയ് സേതുപതിക്കെതിരേയും ഹാഷ്ടാഗുകൾ വന്നുകഴിഞ്ഞു. ഐപിഎല്‍ മത്സരങ്ങള്‍ക്കിടെ പ്രഖ്യാപിച്ച സിനിമയാണ് ഇത്. മുത്തയ്യ മുരളീധരന്‍ പരിശീലകനായുള്ള സണ്‍ റൈസേഴ്സ് ഹൈദരാബാദും ചെന്നൈയും തമ്മിലുള്ള മല്‍സരദിവസമാണ് 800 എന്ന പേരിലുള്ള ചിത്രത്തിന്റെ മോഷന്‍ പോസ്റ്റര്‍ പുറത്തിറക്കിയത്. മത്സരത്തില്‍ ചെന്നൈ, ഹൈദരാബാദിനെ തോല്‍പ്പിച്ചതോടെയാണ് പ്രതിഷേധങ്ങൾ ശക്തമായത്.
വിജയ് സേതുപതി തമിഴ് ജനതയ്ക്ക് അപമാനമാണെന്നും തമിഴ് വംശജരെ കൊന്നൊടുക്കിയ ശ്രീലങ്കയില്‍ നിന്നുള്ള ക്രിക്കറ്റ് താരത്തെക്കുറിച്ചുള്ള സിനിമയില്‍ ഒരു തമിഴ്നാട്ടുകാരന്‍ വേഷമിടുന്നത് അപമാനമാണെന്നും വിമര്‍ശകര്‍ പറയുന്നു.
എന്നാല്‍ സിനിമയ്ക്ക് ശ്രീലങ്കന്‍ രാഷ്ട്രീയവുമായി യാതൊരു ബന്ധമില്ലെന്നും മുത്തയ്യ മുരളീധരനെന്ന ഇതിഹാസ താരത്തിന്റെ ജീവിതമാണ് ചിത്രത്തിന് പ്രമേയമാകുന്നതെന്ന് അണിയറപ്രവർത്തകർ വിശദീകരണവുമായെത്തി. പ്രതിഷേധങ്ങൾ ഉയരുന്നെങ്കിലും മുരളീധരനാകാനുള്ള തയ്യാറെടുപ്പുകളുമായി മുന്നോട്ടു പോകുകയാണ് വിജയ് സേതുപതി.