നവാഗതനായ ഗിരീഷ് എഡി സംവിധാനം ചെയ്ത തണ്ണീർമത്തൻ ദിനങ്ങൾ ഒരു സൂപ്പർ താരസാന്നിധ്യം ഇല്ലാഞ്ഞിട്ടു കൂടി നിറഞ്ഞ സദസ്സുകളിൽ പ്രദർശനം തുടരുകയാണ്. ചില പടങ്ങളിലെ പേരുകൾ ഓർത്തു വയ്ക്കുന്ന പോലെ ഈ സിനിമയിലെ താരങ്ങൾക്ക് പകരം അവരുടെ കഥാപാത്രങ്ങളുടെ പേരുകൾ ഓർത്തു വയ്ക്കുന്നുണ്ടെങ്കിൽ അതാണ് സിനിമയുടെയും കഥാപാത്രങ്ങളെ നമുക്ക് മുന്നിൽ അവതരിപ്പിച്ചവരുടെയും വിജയം. അത്തരത്തിൽ ഒരു കൂട്ടമാണ് തണ്ണീർമത്തൻ ദിനങ്ങളിലൂടെ നമുക്ക് ലഭിച്ചിരിക്കുന്നത്.
അനശ്വര, മാത്യു, നസ്ലെൻ, വൈശാഖ്, ഫ്രാങ്കോ, തുടങ്ങി പേരെടുത്തു പറയേണ്ട അഞ്ചു പേർക്കൊപ്പം സിനിമയിൽ ഒരു ഷോട്ട് എങ്കിൽ അത് അഭിനയിച്ച പിള്ളേർ വരെ തകർത്ത സിനിമ. ഇവരിൽ ഓരോരുത്തരിലും നമ്മുടെ പ്ലസ്ടൂ ലൈഫ് കാണാം എന്നതാണ് ഏറ്റവും വലിയ പോയിന്റ്. അപ്പുറത്തെ ക്ലാസ്സിൽ നിന്നു പ്രേമിക്കുന്നവൻ, സ്വന്തം ക്ലാസിലെ പ്രണയജോടികൾ, വീടിനടുത്തു നിന്നു മുന്നേ കാമുകിയെ സെറ്റ് ആക്കിയവൻ, എന്നാൽ ഇതിലൊന്നും പെടാതെ ഇവർക്കൊപ്പം മുന്നിലെ കാര്യങ്ങളിൽ മാത്രം ചിന്തകളെ അഴിച്ചു വിട്ടു നടക്കുന്ന ഒരുത്തൻ. അങ്ങനെ എല്ലാരുമുണ്ട് ഇവിടെ.
സംഭാഷണം, അഭിനയം തുടങ്ങി മനസ് നിറഞ്ഞു കയ്യടിക്കാതെ നമുക്ക് തിയേറ്റർ വിട്ടു പോരാൻ സാധിക്കില്ല ഇവരുടെ പ്രകടനം കൊണ്ട്.
സിനിമയിൽ വളരെ ചെറിയ പരിചയം മാത്രമുള്ള ഇവർ ആദ്യ ചിത്രത്തിൽ നമുക്ക് തന്നത് മറക്കാൻ സാധിക്കാത്ത സിനിമാനുഭവം ആയത് കൊണ്ട് തന്നെ ഇവരിൽ നിന്നും ഭാവിയിൽ ഇനിയും പ്രതീക്ഷിക്കാം, സിനിമയിലെ താരം എന്നത് കഥാപാത്രം ആണെന്ന് ഒരിക്കൽ കൂടി അവർ നമ്മടെ പഠിപ്പിച്ചു.