ഉണ്ണി മുകുന്ദന്റെ വേറിട്ട ഗെറ്റപ്പിൽ ഒരുങ്ങുന്ന സിനിമയാണ് മേപ്പടിയാൻ. സിനിമ സെറ്റിൽ ഭക്ഷണം ഒരുക്കുന്ന മെസ് ടീമിന് നന്ദി അറിയിച്ച് ഉണ്ണി മുകുന്ദൻ ഫേസ്ബുക്കിൽ പോസ്റ്റ് ചെയ്ത കുറിപ്പിനാണ് ആരാധകർ അഭിനന്ദനവും ആയി എത്തിയത്. സിനിമയ്ക്ക് പിന്നിൽ പ്രവർത്തിക്കുന്ന ആളുകളുടെ ചിത്രം ഉൾപ്പെടെയാണ് ഉണ്ണിയുടെ പോസ്റ്റ്. നിരവധി പേരാണ് ഉണ്ണിയെ അഭിനന്ദിച്ച് രംഗത്ത് എത്തിയത്.
കൊറോണ വ്യാധിയുടെ നടുവിലും ഭക്ഷണം ഒരുക്കുന്ന ആളുകൾക്ക് നന്ദി എന്ന് ഉണ്ണി കുറിപ്പിൽ പറയുന്നു. ഒപ്പം എല്ലാ മുൻകരുതലും സ്വീകരിച്ചാണ് സിനിമ പൂർത്തിയാക്കാൻ ശ്രമിക്കുന്നത് എന്നും അദ്ദേഹം സൂചിപ്പിക്കുന്നുണ്ട്. ഷൂട്ടിങ് താനും ഒപ്പം ഉള്ളവരും ആസ്വദിച്ചു എന്നും, സിനിമ പ്രേക്ഷകർക്ക് ഇഷ്ടം ആകുമെന്ന് കരുതുന്നു എന്നും ഉണ്ണി പറയുന്നു.
വിഷ്ണു മോഹൻ സംവിധാനം ചെയ്യുന്ന സിനിമ നിർമിക്കുന്നത് ഉണ്ണി മുകുന്ദൻ ഫിലിംസ് ആണ്. അഞ്ജു കുര്യൻ ആണ് സിനിമയിലെ നായിക. സിക്സ് പാക്ക് വെടിഞ്ഞാണു ഉണ്ണി മേപ്പടിയാനിലെ ജയകൃഷ്ണനാകുന്നത്.