മലയാളത്തിലെ ഒരു പിടി മികച്ച കഥാപാത്രങ്ങൾ ചെയ്തു കൊണ്ടിരിക്കുന്ന നടിയാണ് പാർവതി. മുൻപ് കസബ എന്ന ചിത്രത്തിന് നേരെ നടത്തിയ അഭിപ്രായ പ്രകടനം വലിയ ചർച്ചകൾക്കും വിവാദങ്ങൾക്കും വഴി വച്ചിരുന്നു. അതിന് ശേഷമാണ് ഇപ്പോൾ ഫിലിം കമ്പാനിയൻ നടത്തിയ ചാറ്റ് ഷോയിൽ വിവാദം ഉണ്ടാക്കിയ അഭിപ്രായം പാർവതി പറഞ്ഞത്.
വിജയ്‌ ദേവരകൊണ്ട നായകനായ അർജുൻ റെഡ്ഢി എന്ന ചിത്രം മൊത്തം സ്ത്രീവിരുദ്ധ ഗ്ലോറിഫിക്കേഷൻ ആണെന്നും അത്തരം സിനിമകൾ പ്രോത്സാഹിപ്പിക്കപ്പെടേണ്ടതല്ലെന്നും ആണ് പാർവതിയുടെ ഭാഗം. അത് സമൂഹത്തെ സ്വാധീനിക്കുകയും വലിയ സാമൂഹിക പ്രശ്നങ്ങൾ ഉണ്ടാക്കുകയും ചെയ്യുമെന്നും പാർവതി പറയുന്നു. വിജയ്‌ ദേവരകൊണ്ടയുടെ മുന്നിൽ വെച്ചായിരുന്നു പാർവതിയുടെ ഈ അഭിപ്രായ പ്രകടനം.
എന്നാൽ ഈ തെറ്റുകൾ എല്ലാം സിനിമയിലേക്ക് ഇടരുത് എന്നും ഒരാൾ വളർന്നു വന്ന സാഹചര്യമോ വളർന്ന രീതിയോ ആണ് സിനിമയിൽ നിന്നും കഥാപാത്രത്തെ അനുകരിക്കാനും മറ്റും പ്രേരിപ്പിക്കുന്നത് എന്നും ദേവരകൊണ്ട പറയുന്നു. പാർവതി പറഞ്ഞത് പൂർണമായും എതിർത്തു കൊണ്ടായിരുന്നു ദേവരകൊണ്ട തന്റെ അഭിപ്രായം പങ്കു വച്ചത്. മനോജ് വാജ്‌പേയ് അതിനെ പിന്താങ്ങുകയും ചെയ്തു.
രണ്ട്‌ പേരെയും എതിർത്തും അനുകൂലിച്ചും നിരവധി പേർ ഇതിനോടകം സോഷ്യൽ മീഡിയയിൽ രംഗത്തെത്തിയിട്ടുണ്ട്‌.